من أكتر الحاجات اللي بتأثر في التسويق للمنتج أو العلامة التجارية بتاعتك، وبيكون ليها مفعول السحر في تكوين صورة إيجابية عنها، وانتشارها بأقل التكاليف، وهي تجربة العميل أو Customer Experience (CX).
تجربة العميل الإيجابية
معناها عمليات شراء متكررة من العميل اللي مر بيها وعجبته، ومعناها كمان توصية إيجابية من العميل ده للمحيطين والقريبين منه، وبالتالي عمليات شراء أكتر.
طيب ازاي أصمم تجربة مرضية للعميل بتاعي؟!
فيه عوامل كتير جدًا تقدر بيها تحقق تجربة مستخدم مرضية للعميل بتاعك Satisfying User Experience.
- من ضمنها -ودي النقطة اللي عايز ألفت النظر ليها- هي إنك ترسم تجربة العميل من الألف إلى الياء!
يعني ايه أرسم رحلة العميل من الألف للياء؟!
يعني لو هنفرض إن الخدمة اللي بتقدمها هي موقع تجارة الكترونية على سبيل المثال E commerce store
يبقى لازم تاخد بالك من إنك تخطط رحلة العميل اللي داخل يشتري بالكامل من أول ما رجله خطت الstore بتاعك، لحد ما يلاقي المنتج اللي بيدور عليه وتتم عملية الشراء.
ده من أول بساطة الموقع بتاعك وتنظيمه، ومرورًا بإنه مريح لعين المستخدمين مش مزعج بصريًا، ولغايةسهولة التنقل ما بين صفحات الموقع، وسلاسة عملية الشراء.
وإنها مش عملية معقدة تخلي المستخدم حتى لو معجب بالstore بتاعك لكن بالبلدي (ناعي هم عملية الشراء والدفع) واللي طبعًا ممكن يخليه يسيب الstore بتاعك خالص ويروح يدور على store تاني أسهل وأبسط.
- التخطيط لرحلة العميل من الأمور المهمة جدًا جدًا.
لأنها بتخليك تحط إيدك على النقط اللي ممكن يستاء منها العملاء وهم بيجربوا المنتج أو الخدمة بتاعتك، وبالتالي تشتغل إنك تحل المشكلة اللي فيها قبل ما تحصل، وده طبعًا هيقلل جدًا عدد العملاء اللي هيمروا بتجارب سيئة أثناء تعاملهم مع الخدمة بتاعك.
فيه نقاط تانية كتيرة بتتكلم عن ازاي تصمم تجربة أفضل للعملاء بتوعك هنتكلم فيها في لقاء قادم.
تعليقات
إرسال تعليق